ភ្នំពេញ៖ នាយករដ្ឋមន្រ្តីកម្ពុជា សម្តេចតេជោ ហ៊ុន សែន បានប្រាប់ដល់អាជ្ញាធរពាក់ព័ន្ធនានា ត្រូវសហការជាមួយអ្នកសារព័ត៌មានក្នុងការស៊ើបអង្កេតនូវបទល្មើស និងបទឧក្រិដ្ឋនានា។

ថ្លែងក្នុងឱកាសជំនួបរវាងនាយករដ្ឋមន្រ្តីកម្ពុជា សម្តេចតេជោ ហ៊ុនសែន និងអ្នកសារព័ត៌មានលើកទី៥ នាល្ងាចថ្ងៃទី១៤ ខែមករា ឆ្នាំ២០២៣ សម្តេចតេជោបានលើកឡើងថា៖ «អ្នកសារព័ត៌មានរបស់យើងក៏ត្រូវចូលរួមចំណែកជាមួយអាជ្ញាធរទាំងឡាយ។ ហើយអាជ្ញាធរទាំងឡាយក៏ត្រូវយកអ្នកសារព័ត៌មានធ្វើជាដៃគូរបស់ខ្លួនក្នុងការស៊ើបអង្កេតនៅបទឧក្រិដ្ឋទាំងឡាយដែលវាបំពានទៅលើច្បាប់ ឧទាហរណ៍ល្បែងស៊ីសង ឬក៏បញ្ហាគ្រឿងញៀន»។

សម្តេចតេជោ បានលើកឡើងថា ការផ្តល់ឱកាសដល់អ្នកសារព័ត៌មានធ្វើការជាមួយអាជ្ញាធរក្នុងការស៊ើបអង្កេតបទល្មើសនានា គឺរួមរំលែកក្នុងការរក្សាសន្តិភាពភូមិឃុំសង្កាត់មានសុវត្ថិភាព។

សម្តេចតេជោ សង្ឈឹមថា អាជ្ញាធរ និងអ្នកសារព័ត៌មាននឹងសហការរួមគ្នាធ្វើកិច្ចការមួយនេះឲ្យបានល្អប្រសើរ។